This topic has 12 replies, 5 voices, and was last updated 20 years, 8 months ago by 
.
- Posts
記得細個果陣時係由女麻女麻照顧我的, 佢好鍚我架! 成日都會買野俾我食, 所以我細個時都算係一名肥妹仔。後來我開始返學, 女麻女麻就無再照顧我喇。
宜家女麻女麻一個人住o係大澳, 佢久不久都會黎下我屋企住, 而佢每次黎到都會講: “你又瘦左喇! 要食多o的野丫嘛!” 所以, 每次女麻女麻黎我屋企住我都會o係佢面前食得特別多野, 免得佢擔心丫嘛!
最近果次女麻女麻黎我屋企, 佢見到我成日都好夜返, 返到屋企又唔願訓覺, 於是臨走果日好語重深長咁同我講: “你呀~夜晚可以早o的返屋企就早o的返啦! 其實我都知你後生女鍾意玩, 又要拍拖, 不過…我成日見你又唔食野, 又唔夠訓, 我個心真係好唔舒服。我鵝得你多你又嫌我長氣, 但係見住你身體比以前差左咁多, 我真係好擔心你架!” 聽完女麻女麻咁講, 我突然間覺得自己好不孝…
我一直以為, 我夜訓係我自己既事, 只要我第二朝識得起身返工就唔會有咩問題; 但原來女麻女麻係咁擔心我既。我以為自己成日病無人理, 但原來女麻女麻係咁關心我既。我以為我瘦唔係因為我唔健康, 但原來o係女麻女麻眼中, 見到我瘦佢係咁心痛既……
我一直以為, 女麻女麻身體好健康, 所以都無乜點關心佢。但想真o的, 其實佢近呢幾年真係比以前消瘦左好多, 而且, 又患左糖尿病。有時, 佢黎到我屋企我都無陪佢, 我真係好唔岩。由細到大, 我都無乜同女麻女麻傾過心事, 但係我知佢好了解我, 佢會知道我幾時開心幾時唔開心, 我知佢好想知道我識左o的乜野朋友, 又或者工作上有無遇到o的不如意既事。但有陣時佢問到我, 我又只係求其敷衍佢幾句就算, 可能係我唔知點樣表達俾佢聽啦!(因為我要用鄉下話同佢溝通的)
佢成日都驚我唔識照顧自己, 所以成日都叫我快o的正正經經咁拍下拖, 搵返頭好人家嫁左佢, 咁佢就可以放心! 哈! 有時我聽到真係覺得佢呢個提意好攪笑!! 莫非我o係佢心目中真係咁細路女?!
我想…真係好想…可以多o的時間同女麻女麻傾下計…可以多o的陪下女麻女麻…..女麻女麻可以身體健健康康!
你有你本事丫嘛~
You must be logged in to reply to this topic.
