放左幾日假，今日卒之可以正式上網，講講站聚總結先。
在下身為搞手，感想遲到，真係唔好意思。
是次站聚一大特色係嘉賓比例竟然達四成 (其實係原本報名人數不高姐~ 哈~)，
好彩預先訂製之細盤菜可以臨時改大，否則非以炒粉麵飯善後不可；
不過嘉賓們位位地位超然、份量十足亦早有準備 (要交換禮物嘛~)，
故著實為當晚平添無數色彩。
是晚主打之盤質素上佳，正如站長企理所言，賣相吸引之餘，
味道適中、肥而不膩日、口感十足，而取價亦見公道，
實在是值得向各位推薦之傳統美食。(當晚之盤菜可參考附圖)
經過團員們約一小時沖廁後….. sorry！係\”衝刺\”至0岩！
火爐上已然奄奄一息之盤菜已所剩無幾 (估唔到個個都冇減肥意欲)，
正好代表，一年一度交換禮物儀式將要立即舉行。
如往年般，各團員精心準備禮物，內有上磅率奇高之朱古力，
亦有在下年年抽中之碗筷套裝，也有常客公仔、咕0臣等，
稍為另類的是高級匙包和筆插及開信刀。
當各團員都各自抽到心頭所好後，意猶未盡，
大夥兒走往隔離搵呀 B 仔 (B 仔涼粉)。
糖水甜品各色其色式，自由發揮，但最令全場震撼嘩然的，
竟然是一碟小小榴槤 pan cake…..
真是「食者知味，聞者塞鼻」…..哈哈~
經過整整一晚盡興，團員們人人捧著肚、舔著咀、掩著鼻，
正式為是次站聚畫上了完滿的句號。
感謝各有份參與之站長站友們於百忙中抽空出席，
亦代表本站對各位長久以來的支持表示致意！
希望不久將來能再為各站友們提供貼文討論以外的歡娛聚會！
